Мөхтәрәм тамашачыбыз!  Сезгә сүзем бар!

     Халык иҗаты... Бу төшенчә шул чаклы киң, тирән - монда халыкның узганы,  хәзергесе, аның алга таба кыйбласы, яшәү рәвеше, дөнья күләмендә тоткан урыны, хисләре, уй-тойгылары - барысы да  аның җырларында, бию үрнәкләрендә, музыка уен коралларында, өс-киемендә, гореф-гадәтләрендә, мәкаль-мәзәкләрендә, тәрәзә бизәкләрендә, читек-кәвешләрендә - бу минем халкымның чагылышы.  Дөнья-күләм сүзе белән әйткәндә - ФОЛЬКЛОР - халык иҗаты.

     Татарстан Республикасы фольклор музыкасы Дәүләт ансамбле - менә шушы мирасны барлау, туплау һәм аны сәхнәләштереп, сәнгатьләштереп, татар халкының янәдән үзенә кайтару, милли тамашачыбызда үз халкына карата горурлык хисе, башка милләт вәкилләрендә - соклану, ярату хисләре уяту. 

    Нәкъ менә шушы юнәлештә  без армый-талмый эшләп киләбез. Омтылышларыбыз тормышка аша бара, уңышларыбыз алга таба эшләргә  яңадан-яңа дәрт өсти. Шушы изге, олы эш белән шөгыльләнүче егет-кызларга мин чиксез рәхмәтле, аларга уңышлар телим!

   Гәрәбәдәй  сибелгән-чәчелгән татар халкының иҗатын бер җепкә тезү, аның мирасын күз алмаслык сәнгати дәрәҗәгә җиткерү - үзе зур бәхет, бу - безнең максатыбыз...дәвам итәргә...

...Сездән уй-фикерләр, көтеп калабыз!

Олы ихтирам белән, Татарстанның халык, Россиянең атказанган артисты, Татарстан Республикасы фольклор музыкасы Дәүләт ансамбленең сәнгать җитәкчесе, Габдулла Тукай исемендәге Татар Дәүләт филармониясенең сәнгать җитәкчесе Айдар Фәйзрахманов.